Сўнгги янгиликлар
Янгиликлар
Вилоят ҳокими Шавкатжон Абдураззоқов маҳаллалардаги ҳоким ёрдамчилари фаолиятини таҳлил қилди. (https://namhaqiqat.uz/siyosat/tanidiy_utgan_yiilishda_hokim_yordamchilari_faoliyati_tahlil_ilindi.html)
Видеоселектор тарзида ўтган муҳокама йиғилишида вилоят секторлари раҳбарлари, дахлдор ташкилотлар мутасаддилари, ҳудудий студияларда шаҳар ва туманлар ҳокимлари ҳамда барча МФЙлардаги ҳоким ёрдамчилари иштирок этдилар.
«Маҳалла тизимига эътибор кучайган. Бугун тамомила бошқача, янгича услубда иш юритиш лозим. Маҳалла еттилиги қанчалик аҳамиятга эга бўлса, унинг асосий бўғини ҳисобланган ҳоким ёрдамчилари ишида ҳам ўзгариш сезилиши даркор. Айниқса, аҳоли бандлигини таъминлаш, янги иш ўринлари яратиш, тадбиркорлар сафини кенгайтириш, хуллас, олдига қўйилган вазифани сидқидилдан бажариши учун ватанпарварлик, фидойилик талаб этилади», — дея таъкидлади вилоят ҳокими.
Таниқли тележурналист Ўғилой Набижоновна Болтабоева Ўзбекистон Маҳаллалари уюшмаси "Медиа маркази" раҳбари этиб тайинланди.
Иқтидорли ижодкор Ўғилой Болтабоева Наманган вилоятининг Янгиқўрғон туманида таваллуд топган. Маълумоти олий, Ўзбекистон Давлат жаҳон тиллари университетининг халқаро журналистика факультетини тамомлаган. Мутахассислиги журналист.
Меҳнат фаолияти давомида "Ўзбекистон" телеканали "Ахборот" информацион дастури муҳаррири, "Ўзбекистон 24" телеканалининг "Парламент вақти" танқидий-таҳлилий кўрсатуви муаллифи, Наманган вилояти ҳокимининг матбуот котиби, "Ўзбекистон 24" телеканалининг Наманган вилоятидаги мухбири сифатида самарали фаолият юритган.
Тиниб-тинчимас, ўз касбининг фидойиси саналган Ўғилой Болтабоева Президент фармонига асосан "Меҳнат шуҳрати" ордени билан тақдирланган.
Сел - катта миқдорда тоғ тошлари, қум ва тупроқ жинслари билан биргаликда тоғдан оқиб тушувчи сув оқими бўлиб, мунтазам жала қуйиши (85% ҳолатларда), тоғ қорларининг эриши (4% ҳолларида), тоғ сув ҳавзалари, сув омборлари, музлаган сув ҳавзалари қирғоқларининг ўпирилиб кетиши (1,3% ҳолларида) ва бошқа сабаблар (9,7% ҳолларда) олиб келиши мумкин.
Катта ҳажмга ва юқори тезликка эга бўлган сел оқими, йўлидаги барча биноларни, аҳоли яшайдиган уйларни, гидротехник иншоотларни бузиб, қишлоқ хўжалик экинларини, боғларни пайҳон қилади. Одамлар ва ҳайвонларни нобуд қилади.
Ўзбекистон Республикасидаги барча тоғ ва тоғ олди ҳудудлари сел хавфи бўлган зоналарга киритилган. Республиканинг Наманган вилояти Фарғона водийсининг энг ҳавфли сув тошқини ва сел хавфи мавжуд ҳудудлардан ҳисобланади.
Сел оқими вужудга келиши апрел ва май ойларига тўғри келади, бу даврда тоғ ва тоғ олди ҳудудларида кўп ёмғир ёғиши кузатилган.
Сел хавфи бўлганда аҳолининг ҳаракати бўйича тавсиялар
- Сел хавфи бўлган ҳудудларда яшовчи ҳар бир киши унинг уйи, хўжалигини сел келиш ҳудудида жойлашганлиги ҳақидаги маълумотга эга бўлиши керак ва Узгидромет, ФВБ, ҳокимият вакиллари томонидан берилган кўрсатмаларги сел ва сув тошқинидан ҳимоя қилиш йўл-йўриқларига албатта амал қилиши лозим.
- Сел оқимининг ўтиши ва унинг оқибатлари катта моддий зарар келтириб, одамлар ҳаёт ва соғлиғига хавф туғдириши мумкин (сел оқибатида одамларнинг қурбон бўлганлиги бир неча марта қайд қилинган).
- Сел оқимларидан фақат қочиб қутилиш мумкин. Сел хавфи тўғрисида ҳабар эшитгандан сўнг дархол хавфсиз жойга кўчиш ҳаракатларини қилиш керак. Сел оқимининг тез фурсатда шаклланиши, унинг тезлигини ҳисобга олган ҳолда, хабар тарқатиш ва муҳофаза тадбирларини бажариш учун вақт жуда чегараланганлигини (5-20 дақиқагача бўлиши мумкин) доимо ёдда тутиш лозим.
- Сел оқимидан халос бўлишнинг иложи бўлмаса, баландроқ тепалик устига, дарахтга ёки бирор баландроқ мосламалар устига чиқиш керак. Одатда сел 3-5 соат вақт давом этиши мумкин.
- Сел оқими ўтгандан сўнг девор ва устунларнинг ҳолатини, газ, электр ва сув таъминотининг созлигини текшириш зарур.
Д.Хамидов
Косонсой тумани А ва ҲМҚБ бошлиғи, подполковник
Ўзбекистон Республикаси Вазирлар Маҳкамасининг 2020 йил 20 октябрдаги “Ёнғин хавфсизлиги қоидаларини тасдиқлаш тўғрисида”ги 649-сонли қарори 40-боб, Қурилиш объектларига қўйиладиган ёнғин хавфсизлиги талаблари 1-§. Умумий қоидалари 823 банди талабларига асосан, Қурилиш объектларида (ҳудуд, бино, иншоот, қурилиш ишлари олиб борилаётган иморат ва қурилма, қайта таъмирлаш, функционал вазифасини қайта ихтисослаштириш, техник жиҳатдан қайта жиҳозлаш, қайта тиклаш, модернизация қилиш, мукаммал ва жорий таъмирлаш) ишлаб чиқариш, омбор ва ёрдамчи бино ва иншоотларни жойлаштириш қурилиш бош режасига мос бўлиши шартлиги кўрсатиб ўтилган, шунга кўра Косонсой туманида 2024 йилда қурилаётган ва реконструкция қилинаётган йирик қурилиш объектларида “Қурилиш-монтаж ишларини олиб бориш жараёнида юзага келиши мумкин бўлган фавқулодда вазият (ёнғин)ларнинг олдини олиш ва уларда ҳаракат килиш” бўйича объект раҳбари ва ходимларнинг тайёргарлиги ва амалий кўникмаларини ошириш мақсадида бир қатор ижобий ишлар амалга оширилмоқда.
Жумладан, жорий йилнинг 7 февраль куни ҳафтанинг ҳар чоршанба куни ўтказиладиган “Фавқулодда вазиятлар профилактикаси куни”ни ўтказиш бўйича алоҳида режа ишлаб чиқилиб Наманган вилояти Фавқулодда вазиятлар бошқармаси бошлиғи ўринбосари ва раҳбар ходимлар иштирокида туманнинг Гулобод МФЙ худудида янгитдан барпо этилаётган 400 қатновга эга туғруқхона биносида маскан ишчи ва хизматчи ходимлари билан профилактик тарғибот тушунтириш ишлари олиб борилиб соҳага оид йўриқномалар берилди.
Тадбир давомида объектда фавқулодда вазият (ёнғин)ларни олдини олишга қаратилган тадбирларнинг амалга оширилганлиги, қурилиш ишларини олиб бораётган қурилиш ташкилоти томонидан фуқаро мухофазаси тузилмаларини ташкил этилганлиги, объектда фавқулодда вазият (ёнғин)лар содир бўлганда объект фуқаро мухофазаси тузилмаларини ҳаракатини, юзага келган вазият бўйича тегишли хизматларга хабар бериши, вайрона остида қолган қурувчини қидирув ва қутқарув ишларини ташкил этилганлиги, жабрланганларга биринчи тиббий ёрдам кўрсатилганлиги, юзага келган фавқулодда вазият (ёнғин)лар оқибатларини бартараф этиши ва бошка зарурий тадбирлари амалга оширилганлиги бўйича сухбатлар ўтказилди. Бундан ташқари туман Фавқулодда вазиятлар бўлими ходимлари томонидан ҳозирги кунда барча қурилиши режалаштирилаётган биноларда ёнғин ва фавқулодда ҳолатларни олдидини олиш мақсадида, ҳар бир бинода ёнғинга қарши оралиқ масофа қолдириш ва ёнғинга қарши девор қурилиши, ёнғин ўчириш автомобили эркин харакатланиши учун қаттиқ қопламали йўл билан таъминланиши, зарурий ёнғинга қарши воситалар билан жиҳозланиши ва бошқа бир қатор зарурий чора-тадбирлар амалга оширилиши борасида тушунтириш ишлари олиб борилди.
Зуҳриддин Абдураҳмонов,
Косонсой тумани ФВБ катта инспектори, капитан
Бугунги кунда аҳолининг яшаш шароитини яхшилаш, одамлар билан билан очиқ мулоқот орқали уларни қийнаб келаётган муаммоларга ечим топиш мақсадида фуқаролар қабуллари ўтказилиб келинмоқда.
Бугун 1-сектор ҳудудидаги “Кушон” маҳалласида Косонсой тумани ҳокими Дилмурод Қодиров туман ҳокими ўринбосарлари иштирокида фуқаролар билан сайёр қабул ўтказилди.
Очиқ ва самимий мулоқот тарзида кечган қабулда уй-жой, моддий ёрдам, коммунал хизмат, соғлиқни сақлаш, бандлик, ер, тадбиркорлик ва бошқа масалаларга оид 20 дан ортиқ мурожаатлар келиб тушди.
Қабул давомида барча мурожаатлар тегишлича ўрганилди ва аҳолини қийнаётган муаммоларнинг аксарияти жойида ҳал этилди.